Планетарий (жаңа лат. planetarіum, лат. planeta - планета, ғаламшар) — жұлдызды аспан, күн, ай және планеталардың кескінін жарты сфералық күмбез түріндегі экранға түсіріп көрсетуге арналған аппарат.
Планетарий залы ғұлама ғалым Әбу Насыр әл-Фарабидің астрономия (Жұлдыздар туралы ғылым) ғылымына арналған.
Фараби ілімінде жұлдыздар туралы ғылым - бұл аспан қозғалысы туралы ғылым болып табылады, соның арқасында біз планеталардың жолдарын және олардың өз көктерінде қарсы тұруын, олардың қозғалысын, шегінуін және тоқтауын білеміз. Әл-Фарабидің тұжырымдамасында, бұл көктегі қозғалыстарды зерттеуді арифметика мен геометрия арқылы зерттеуге болады.
Жұлдыздар туралы ғылымды ғұлама екіге бөліп қарастырды: 1) астрология 2) астрономия. Егер Птоломей Жердің ешқандай айналысқа түспейтіндігін дәлелдесе, Әбу Насыр физикасында Жер өз орнында ешқандай қозғалысқа ұшырамайды деп ой айтқан. Әл-Фарабидің Птоломейдің Альмагесіне түсіндірме атты еңбегі сол кездегі астрономияның тақырыптық алаңы туралы неғұрлым толығырақ мәліметтерден тұрады. Ол еңбекте астрономиялық кестелерді құрастырудың принципиальды теориялық негіздері берілген.
