КІТАП ОҚИТЫН КІТАПХАНА ЖЕТІСТІГІ
Кітап – рухани қазына, ал кітап оқитын ұрпақ – елдің ертеңі! Шымкент қаласында кітапсүйер қауымды бір арнаға тоғыстырып, әдебиетке деген сүйіспеншілікті арттырған «Кітап түні» фестивалі өз мәресіне жетті. Фестиваль аясында 11 рет кітап талқылау кеші ұйымдастырылып, қаладағы кітапханалар мен білім беру ұйымдарынан жиналған кітапқұмар жастардың басын қосқан ерекше әдеби орта қалыптасты.
Фестивальдің ең ауқымды талқылау кештерінің бірі Әл-Фараби атындағы қалалық ғылыми-әмбебап кітапханасында өтті. Бұл басқосуда қазақ әдебиетінің көрнекті өкілі Мұхтар Мағауиннің тарихи танымды тереңдететін «Аласапыран» роман-дилогиясы талқыланды. Тарих пен тағылымды тоғыстырған әдеби кеш қатысушыларға ұлттың өткені мен рухани мұрасын жаңаша пайымдауға мүмкіндік берді.
Шымкент қалалық жастар саясаты басқармасының бастамасымен жүзеге асқан жоба аясында қала кітапханалары мен мектептерінің кітапсүйер жастары арасында өзара сыйластыққа, ізденіске және рухани дамуға негізделген жарасымды орта қалыптасты. Осы жобаға біздің кітапхананың жас мамандарынан құралған «Әл-Фараби» оқырмандар клубы да тұрақты қатысып, әр басқосуда белсенділік танытып келеді.
Жобаның жүйелі ұйымдастырылып, мазмұнды өтуіне ұйытқы болып жүрген қоғам белсендісі, «Серпіліс» қоғамдық қорының жетекшісі Бейсенкүл Нарымбетованың еңбегі ерекше атап өтуге лайық. Кітапқа құштар жандарды ортақ мақсатқа жұмылдырып, оқырмандық мәдениетті дамытуға қосып жүрген үлесі – жастардың рухани кемелденуіне бағытталған маңызды жұмыс.
Фестивальдің қорытынды кеші Төлеген Айбергенов пен Фариза Оңғарсынованың шығармаларын жатқа оқу және талқылауға арналды. №2 Қалалық оқушылар сарайында өткен бұл кездесу әсерлі сәттерге, жалынды жырларға және қызықты әдеби тартысқа толы болды. Ақындардың өлеңдерін жатқа оқуға кезекке тұрған қатысушылардың ықыласы поэзияның әлі де жүректерді тербеп, рухты көтеретін құдіретті күш екенін көрсетті.
Қуанышты жаңалық – «Әл-Фараби» оқырмандар клубының жетістігі! Жобаға тұрақты қатысып, белсенділік танытқан біздің топ 50 000 теңгелік сертификатқа ие болды. Сонымен қатар, қатысушыларға ынталандыру сыйлығы ретінде кітаптар табысталды. Бұл марапат – жас кітапханашыларымыздың ізденісі мен табандылығының, кітапқа деген шынайы ықыласының жемісі. 
Ең бастысы, бұл жобаның нәтижесі тек марапатпен өлшенбейді. Бір кітапты бірге оқып, бірге талқылаған жандардың арасында достық пен сенім қалыптасты. Әдебиетке құштар жас мамандар, оқушылар, студенттер мен ұстаздар бір мақсатқа ұйысып, кітаптың адамды жақындастыратын, сананы жаңғыртатын күш екенін дәлелдеді.
Кітап оқитын ұлт қалыптастыру – ел болашағына салынған инвестиция! Президентіміздің білімді, саналы, рухани бай ұрпақ тәрбиелеуге бағытталған саясатын қолдай отырып, Шымкент қаласы кітап оқу мәдениетін дамытуға, жастардың зияткерлік әлеуетін арттыруға және ұлттық құндылықтарды дәріптеуге үлес қоса береді.
Кітап төрге шықса – ой биіктейді, сана жаңғырады, ұлттың рухы асқақтайды!
Оқитын ұрпақ – озық ұлттың кепілі!
#КітапОқитынКітапхана #КітапТүні #ӘлФарабиКітапханасы #ӘлФарабиОқырмандарКлубы #КітапОқитынҰлт #Шымкент #Руханият #КітаппенБірге #жастарсаясатыбасқармасы
#ІшкіСаясатБасқармасы #шымкентоқитынқала
#шымкентжастарсаясаты-басқармасы
