“МАРХАБАТ” журналына жазыламыз десеңіз, мархабат
Бүгін кітапханамызда қарымды қаламгер, көрнекті журналист, жазушы, аудармашы Мархабат Байғұттың 80 жылдығы жобасы аясында “МАРХАБАТ” журналы мен “Markhabat.kz” ақпараттық порталының таныстырылымы өтті.
Түркістан облыстық мәслихат депутаты, белгілі журналист, “Медиакратия” қоғамдық бірлестігінің төрағасы Ғалымжан Елшібай мырзаның бастауымен, журналист Оралхан Дәуіт бас редакторлық ететін журнал Шымқаламыздың зиялы қауым өкілдеріне, әдебиетшілер мен кітапхана оқырмандарына сүйінші болып жетті.
Шарада Түркістан облысы әкімінің орынбасары Ертай Кенжебекұлы Алтаев пен Шымкент қаласы әкімінің орынбасары Сәрсен Абайұлы Құранбек, Шымкент қаласы мәслихатының төрағасы Баһадыр Мәдәліұлы Нарымбетов құттықтау сөз сөйлеп, жаңа басылымға ақ жол тіледі.
Сондай-ақ, зиялы қауым өкілдері жаңа басылымға және жоба жетекшілеріне ризашылығын білдіріп, жас ақындар Мархабат ағамызға арналған жырларын оқып, кештің әрін аша түсті.
Сағынышқа айналған суреткердің шығармашылығы мен өмір жолын насихаттайтын журнал мен ақпараттық портал өз жұмысын бастады. “МАРХАБАТ” журналына жазыламын десеңіздер, мархабат!
