Кітапханамызда "Ақерке" балалар залының ұйымдастыруымен "Оқитын отбасы - ұлт болашағы" жобасы аясында кітапхананың тұрақты, үздік, үлгілі оқырмандары Сахабай әулеті, Күләш ана жанұясымен кездесу кеш өтті.
Кездесу барысында Сахабай әулетіндегі отағасы Серік Сахабайұлы өзінің кітап оқу арқылы үлкен жетістіктерге жеткенін баяндап, отбасында кітап оқуды күнделікті дағдыға айналдырудың маңызды екендігін, адамзат үшін кітаптың берер тәрбиесінің мол екені туралы ойымен бөлісіп, оқырмандармен кітап жайлы сұрақ-жауап тұрғысында ойындар ойнатып, жеңімпаздарға сыйлықтар үлестірді. Жеті ұл-қыздың анасы Айтжан ханым өзінің балаларына кішкентайынан кітап оқытатынын айта келе, балаларға қандай кітаптар оқу керектігі жөнінде кеңестер берді. Сахабай әулетінің үлкен ұлдары Рамазан, Айсұлтан, қыздары Айсезім мен Айсері өздерінің оқыған кітаптары, кітап оқудың пайдасы жайлы өз ойларымен бөлісіп, кітап оқумен қатар бос уақыттарын тиімді пайдаланатындарын, жүзу, гимнастика, тоғызқұмалақ және т.б. спорт түрлерімен де айналысатындықтарын да айтты.
Шара соңында кітапхана директорының орынбасарлары Гүлмира Батырбайқызы мен Асылзат Оспанқызы Сахабай әулетінің сегіз қырлы, бір сырлы, көпке үлгі көпбалалы отбасы екеніне ризашылықтарын білдіріп, кітапхана директорының алғыс хатымен марапаттады. Кездесу кеш Күләш апамыздың балаларға берген керемет батасымен аяқталды.
