ШЫМКЕНТТЕ «БАБАЛАР ІЗІМЕН: ҚАЗАҚ ДАЛАСЫНДАҒЫ МҰСЫЛМАНДЫҚ МЕКТЕП» АТТЫ КІТАПТЫҢ ТАНЫСТЫРЫЛЫМЫ ӨТТІ
Бүгін Шымкент қалалық «Әл-Фараби» атындағы ғылыми-әмбебап кітапханасында Қазақстан мұсылмандары діни басқармасының төрағасы, Бас мүфти Наурызбай қажы Тағанұлының жетекшілігімен жарық көрген «Бабалар ізімен: Қазақ даласындағы мұсылмандық мектеп» кітабының таныстырылымы өтті.
Бұл еңбекте исламның Қазақ даласына келу тарихы, халқымыздың әдет-ғұрпы мен сал-дәстүріндегі діннің алар орны мен бабалар ұстанған шариғат парыздары мен иман негіздері, сондай-ақ мұсылмандық әдеп жоралғылары қамтылған. Кітап дін саласының мамандарына, тарихшылар мен зерттеушілерге, сондай-ақ жалпы оқырман қауымға арналған.
Іс-шараны дінтанушы-магистр Мұхамеджан Естеміров жүргізді. Алғашқы кіріспе сөз Қазақстан мұсылмандары діни басқармасының төрағасы, Бас мүфти Наурызбай қажы Тағанұлына берілді. Бас мүфти Қазақстан мұсылмандары діни басқармасы соңғы жылдары дәстүрлі танымдарға, дін мен дәстүрге, ұлттық құндылықтарға ерекше назар аударып келе жатқанын айрықша атап өтті.
Басқосу аясында Шымкент қаласы ардагерлер кеңесінің төрағасы Төлебаев Кенжехан Атақұлұлы, Мемлекет және қоғам қайраткері Шалатай Мырзахмет, ҚМДБ Төрағасының орынбасары, найб мүфти Кенжәлі Қоңыратбайұлы, Шымкент қаласы Дін істер басқармасының басшысы Бахтияр Өнербаев сөз сөйледі. Іс-шарада кітапхана қорына “MUFTIYAT” баспасынан жарыққа шыққан кітаптарды сыйға тартты.
Іс-шараға қатысқан мемлекет және қоғам қайраткерлері, зиялы қауым өкілдері, ғалымдар, ақын-жазушылар мүфтияттың игі бастамасы жайлы жылы пікірлерін жеткізіп, ізгі ниеттерін білдірді. Басқосу барысында бабалар рухына Құран бағышталып, Бас мүфти арнайы дұға жасады.
ҚМДБ-ның Шымкент қаласы
бойынша баспасөз қызметі
