ЖЕҢГЕСІ МЕН ЕРКЕСІ
Әл-Фараби атындағы қалалық ғылыми-әмбебап кітапханамыздың 10 жылдығы қарсаңына орай ұйымдастырылған “Жеңгесі мен еркесі” атты байқау болып өтті.
Қазақы салт-дәстүрді сақтау, әдет-ғұрыптарды жаңғырту мақсатында ұйымдастырылған байқауға қала кітапханаларының кітапханашылары қатысты.
Жеребе тарту арқылы реттік санын анықтап алған қатысушылар, таныстыру, көркем әдебиет бойынша сұрақтар, әдет-ғұрып, салт-дәстүр бойынша сұрақтар және “өнерлі қыз, өнегелі жеңге” атты төрт кезеңде бақ сынады.
Белгілі драматург, ҚР Мәдениет қайраткері Сая Қасымбек, ҚР Мәдениет саласының үздігі, Әдет-ғұрып Салт-дәстүр Орталығының бөлім басшысы Гүлшат Жаһанқызы, Қазақстан журналистер Одағының мүшесі, ақын Лаура Тастанбек сынды мәдениет майталмандары қазылық еткен байқау, кітапханашылардың нағыз әмбебап мамандар екеніне тағы бір көз жеткізді.
Қазылар алқасы ойларын қорытып, нәтиже шығарғанша көрермендерге викториналық сұрақтар қойылып, жылдам әрі нақты жауап берген жандарға ерекше кәде-сыйлар берілді.
Байқауды кітапхана директоры, ф.ғ.к. Анар Абусайылқызы қорытындылап, қатысушыларға қолдау білдірген қала кітапханаларының басшылары мен ұжымдастарына шынайы алғысын жеткізді. Барлық қатысушылар арнайы номинациялармен марапатталып, бағалы сыйлықтарға ие болды.
Кітапханамыздың 10 жылдығына орай ұйымдастырылған арнайы жобамыз - қазылар алқасы мен қалың көрерменнің көңілінен шығып, алдағы уақытта қалалық деңгейде өтуіне тілектестік білдірді!
