Әл-Фараби атындағы қалалық ғылыми-әмбебап кітапханасында «Өнер» бөлімінің ұйымдастыруымен Ж.Шанин атындағы қазақ академиялық драма театрының актрисасы, ҚР Мәдениет қайраткері, «Дара» төсбелгісінің иегері Гүлшат Ермекбайқызы Еспайдың 75 жасқа толуына орай «Өмірі өнерімен өрілген» атты шығармашылық кеші өткізілді.
Кешке танымал өнер майталмандары С.Өтемісұлы, А.Жұмабекова, Р.Салова, Е.Шымырқұлов, Н.Қаламбаева, Б.Сегізбаев және драматург С.Қасымбек, ақын А.Әлива қатысып, әріптесі Гүлшат Ермекбайқызының өмірі мен шығармашылығы жайлы әдемі әңгімелерімен бөлісті.
Ж.Шанин атындағы академиялық қазақ драма театрының артистері М.Байғұттың «Жоғалған жұрнақ», Ә. Оразбековтың «Бір түп алма ағашы», және «Күтпеген кездесу» шығармаларынан үзінділер қойылды.
Ақын, ҚР Үкіметінің Дарын мемлекеттік жастар сыйлығының иегері Батырхан Сәрсенханның «Ана қасқыр» өлеңін кітапхана қызметкері Пазыл Санат жатқа айтты.
Индустриялды техникалық колледжінің бір топ студенттері қатысқан шығармашылық кешті кітапхананың директор орынбасары Асылзат Оспанқызы жүргізді.
