“КІТАП ОҚУ - ОЗЫҚ ОЙЛЫ ҰЛТ БОЛУ”
Бүгін кітапханамызда “23 сәуір - Халықаралық кітап және авторлық құқықты қорғау күні” мерекесі аясында “Кітап оқу - озық ойлы ұлт болу” тақырыбында әдеби кеш өтті.
Шараны кітапхана директоры, ф.ғ.к. Анар Абусайылқызы алғысөзімен ашып, ойы озық оқырмандарды, кітапхана қонақтарын мерекемен құттықтап, кітап оқуға шақырды.
Кітап көрмесін тамашалаумен басталған әдеби кеш кітапхана қызметкері Мейіржан Жарылқаптың арнауымен, “Кітап ханшайымының” монологымен жалғасты.
Әдеби кеште сөз алған Қазақстан Жазушылар одағының Шымкент қаласындағы өкілетті өкілі - ұйым төрағасы Момбек Әбдіәкімұлы мен жазушы-журналист, қарымды қаламгер Заһардин Қыстаубайұлы кітаптың адам өміріндегі орны мен қызметін, пайдасы мен жақсылығын жас оқырмандарға жеткізді.
“ALQA” әдеби бірлестігінің композициясымен әрленген кеш белгілі драматург, режиссер-драматург Сая Қасымбектің, журналист, қоғам белсендісі, “Қызмет” газетінің бас редакторы Бейсенкүл Нарымбетованың кітап жайлы ой-пікірлерімен жалғасты.
ҚР ІІМ Бауыржан Момышұлы атындағы оқу орталығының басшы орынбасары, подполковник Маратов Ильяс Искакович әскери адамдардың кітаптан алыс емес екенін айтса, айтыскер ақын Бөрібай Оразымбетов пен Ж. Шанин атындағы қазақ академиялық театр қызметкері Алтынай Әлиева кітап оқу-жетістікке жетудің бірден бір құралы екенін тілге тиек етті.
Шарада кітапханамыздың тұрақты оқырмандары арасында дәстүрлі түрде өтетін “Үздік оқырмандары” марапатталды. Оқырман жастармен “Ғажайыптар алаңында” атты викториналық сұрақ-жауап ойындары өтті.
Әдеби кештің соңында кітапхана басшысы Анар Абусайылқызы шараға қатысқан барша қонақтар мен оқырмандарға алғысын айтып, оқимын деген жандар үшін кітапханамыздың есігі әрдайым ашық екенін жеткізді.
