ШЕШЕН СӨЗДІҢ ШЕБЕРІ
Кітапханамыз тағы бір мәртебелі мейманның мерейтойын атап өтті. Сонау 90 шы жылдардан айтыс сахнасына еніп, күні бүгінге дейін өңін бермей келе жатқан өнердің өз адамы - Карима Оралова - 50 жаста! Қазақтың төл өнерін төбесіне көтеріп, домбырасын қолына тастамай әлем аралап айтысқан ақын қыз, Мәскеу, Париж сынды қалаларды жалынды жырларымен сусындатқан.
Осыған орай, бүгінгі күн айтыстың ақ қанатты аруы, алдаспан өнердің майталманымен келелі кездесу, сырлы сұқбат болды. Көрермендер арнау мен терме тыңдап, айтыс көрді.
Қала әкімдігінің қолдауымен, Мәдениет басқармасының бастамасы сеп болып, Әл-Фараби атындағы қалалық ғылыми-әмбебап кітапханасының ұйымдастыруымен болған шараны, кітапхана директоры, ф.ғ.к. айтыскер ақын Анар Жаппарқұлова кемеліне келтіре жүргізіп отырды.
Отыз жылдан аса уақыт сахнадан түспеген Карима Оралова бұл күнде ақын ана, ұлағатты ұстаз. Шәкірттерінің алды халықаралық, республикалық аламандардың алдын бермейтін жүйріктер. Осынша жылғы еңбегін елеп-ескерген мемлекетіміз “Мәдениет саласының үздігі” төсбелгісімен марапаттаған.
Карима Датанқызымен кездесуге келген көрермендері, жақындары, ұстаздары, ақын әріптестері мен шәкірттері керемет кештің куәсі болды. Қаршадайынан танып қанатына алған Ханбибі Есенқарақызы алғы сөз сөйлеп, ұстазы Сәбит сері ақжарма тілектерін жаудырды.
