Әл-Фарабидің туған жері Отырарға сириялық фарабитанушы ғалым, философ, музыкант Шехабеддин Ахмет Фарфур арнайы ат басын бұрды. Арнайылап келген қадірменді қонақпен музейде аудан халқының қатысуымен кездесу ұйымдастырылды.
Кездесуді Қ.А.Ясауи атындағы Халықаралық Қазақ-Түрік университетінің оқытушысы, аудармашы Қасымбеков Жусіпбек Айдарбекұлы жүргізді. Іс-шараға фарабитанушы ғалым Кенжетай Досай Тұрсынбайұлы, Отырар ауданына еңбек сіңірген білім және мәдениет қызметкері Жаппарқұлов Пердехан Абайұлы, өлкетанушы, фарабитанушы Бекжан Бейсенбай, өлкетанушы, этнограф Абдулла Жұмашовтар қатысып келелі ойларымен бөлісіп, фарабитанудағы мәселелерді ортаға салды.
Кездесуде Әбу Нәсір әл-Фарабидің әлемдік музыка ғылымына қосқан орасан зор үлесі, оның шығарған әуендері және олардың күрделі құрылымдары туралы кеңінен баяндаған Шехабеддин Ахмет Фарфур мырза Фарабидің жерлестеріне арнап оның әндерінен тебіренте орындады.
Шараны Әл-Фарабидің зерттеген, заманында өзі ойнаған «Канун» музыкалық аспабының сүйемелдеуімен Отырар аудандық мәдениет үйінің әншілері орындаған Әбу Нәсір әл-Фарабидің өлеңіне жазылған Сағынтай Құттыбайдың «Қашықтасың туған ел» әні қорытындылады.
Алдағы уақытта Шехабеддин Ахмет Фарфур мырзамен Әл-Фарабидің мұралары және оларды жинастыру, зерттеу жұмыстары бойынша өзара тығыз ынтымақтастықта жұмыс істеу келісілді. Соңында музейдің пікір кітабына өзінің ыстық лебізін өлеңмен жазып қалдырды.
