Әл-Фараби атындағы қалалық ғылыми-әмбебап кітапханасында он жасынан бастап сирек кездесетін қатерлі дертке ұшырап, өмірінің оннан астам жылын сол дертпен күресуге арнаған, ақыр-аяғында өзінің өмірге деген құштарлығы мен сарқылмас ерік-жігерінің арқасында қатерлі дерттің «қасірет» құрсауын бұзып шығып, еркін өмір мен бақытты тұрмысқа қол жеткізген өр рух пен өмірге ғашық нәзік жүректің иесі Жәмиля Бахтиярқызы кітапхана оқырмандары мен қаламыздың бетке ұстар бірқатар зиялы тұлғаларымен кездесті.
Елімізге белгілі жазушы-журналист Күлия Айдарбекова тізгінін ұстаған кеш барысында Қазақстан Жазушылар одағы Шымкент қалалық филиалының төрағасы, ақын Дәркен Танабаев пен бірегей фантаст-жазушы Сарманбай Исақ арнайы сөз сөйлеп, жігер мен ізгіліктің ұясы болған нәзік жүрек иесі Жәмиляға ақеділ ағалық тілектері мен келешегіне деген мол үміт, зор сенімдерін білдірді.
Риясыз сұхбатқа құрылған жүздесуде автордың өзінің өмір жолымен өрнектелген тырнақалды туындысы жайлы оқырмандар тарапынан сұрақтар қойылып, түрлі пікірлер айтылды. ОҚМПУ-нің 3 курс студенті Тұрғанбек Самал, Турсунова Гүлнұр, Құттыбекова Арайлым, Тұмарбек Әсел оқырмандық ой-пікірін білдірді.
Сондай-ақ, жас қаламгердің өмірге деген құштарлығы мен биік болмысы айқын аңғарылатын шығармаларындағы оймақ ойлар мен тұшымды тіркестер, өрелі өлеңдері оқылған кеш барысында Жәмиляның кітабын өзбек тіліне тәржімалап, танытып жүрген ақын, аудармашы Момынжан Закиржанов та сөз сөйлеп, «Жәмиляның кітаптары қазірдің өзінде оқырманның ыстық ықыласына бөленіп үлгерді. Қолдан-қолға көшіп, үзбей оқылуда. Келешегі Жәмиля бұдан да үлкен нәтижеге қол жеткізеді деген сенімім кәміл» деп авторға өз ризашылығын жеткізді.
https://www.facebook.com/100064780246885/videos/1238656687033487/
