Танысыңыздар жаңа кітаптар!
Әл-Фараби қалалық ғылыми-әмбебап кітапханасының қоры «Мазмұңдама» қоғамдық қоры шығарған қазақ тіліндегі мотивациялық кітаптар топтамасымен толықты.
Біреудің жеткен жетістігі таңқалдырумен қатар, қанаттандыратыны да анық. Сондықтан мотивацияңыз төмендеген кезде табысқа кенелген адамдардың кітаптарын оқып тұрған жөн. Соны негізге алып, «Мазмұңдама» қоғамдық қоры қазақ тіліндегі мотивациялық кітаптар топтамасын жасады. Осы шығармаларды оқысаңыз, санаңызда төңкеріс орын алып, бір серпіліп қалатыныңыз анық.
Анжела Дакуорт «Табандылық: құштарлық пен төзімділік қуаты». Автор осы екі қасиетті қалыптастырып дамытуға болатынын нақты зерттеу нәтижелеріне сүйеніп, психологтардың зерттеуіне талдау жасай отырып, түрлі салада табысқа қол жеткізген адамдардың және өз өмірінің мысалдары арқылы баяндайды.
Джен Синсеро «Сен мықтысын. Өзіңе күмәнданба, шалқып өмір сүр». Жаңаша өмір сүргің келе ме, онда ешқашан қолыңа алмаған істен баста. Кітапта өзін-өзі дамытудың ең тиімді 25 әдісі баяндалады, олардың әрқайсысы Джен Синсеро өз басынан өткізген нәтижелі әдістер.
Джен Синсеро «Сен табыскерсің. Ойыңды өзгерт, ақша тап». Автор бұл кітабында ойлау жүйесін өзгерту арқылы армандағандарының бәріне қол жеткізуге болатының өз өмірінен мысал келтіре отырып жазады.
Кэрол Дуэк «Ойлау. Табысқа жетудің жаңа психологиясы». Өміріңіз мәнді, мағыналы болсын десеңіз, ойыңызды өзгертіңіз. Өзгерісті өзіңізден бастаныз. Ұмтылыңыз, үйреніңіз, мақсатқа жету жолында талмай еңбектеніңіз. Осылайша зор табысқа жетесіз. Автордың айтпақ ойы осы.
Рой Бауместер, Джон Тирни «Ерік-жігер. Өз өміріңді бақылай біл». Бұл кітапта авторлар ерік-жігер мен өзін-өзі бақылауды бірте-бірте өз өмірінің күнделікті бір бөлікке айналдырудың, яғни өзіңді «ақылға бағындырудың» көптеген тәсілдерін баяндайды.
Энтони Роббинс «Бойыңдағы алыпты оят». Кітапта менталдық, эмоциялық, физикалық және қаржылық тағдырын өзі басқаруына ықпал ететін нақты әдістер берілген. Осының барлығын өз қолына алған адамның алмайтын шыңы болмайды.
Кітаптар көпшілік оқырманға арналады.
