️«Ұлағатты ұстаз, шығармашыл тұлға»
Кітапхананың «Өлкенің өнер майталмандары» атты жобасы аясында ҚР Мәдениет қайраткері, ҚР Суретшілер Одағы Түркістан облысы филиалының төрағасы, ҚР Суретшілер одағының мүшесі, «Ы.Алтынсарин» медалі, «Ә.Қастеев» атындағы алтын медалі, мемлекеттік «Ерен еңбегі үшін» медалінің иегері, суретші, кескіндемеші Шилібаев Нұрлан Шилібайұлының шығармашылық кездесу кеші өтті.
Кітапханада кеш авторының жазған картиналары қойылып, көпшіліктің назарына ұсынылды. Мәдениет саласының ардагері Асқар Әлихан жүргізген шығармашылық кеште ҚР Мәдениет қайраткері, педагогика ғылымдарының докторы, профессор, Қ.А.Ясауи атындағы ҚТУ-нің бейнелеу өнері кафедрасының профессоры Ералин Қуандық, ҚР Суретшілер одағының жауапты хатшысы Жамбыл Нартбаев, ҚР Мәдениет қайраткері, Түлкібас ауданының Құрметті азаматы, Қазақстандық салалық мәдениет, спорт туризм және ақпарат қызметкерлерінің кәсіптік одағы Түркістан облыстық филиалының төрағасы Бастарбек Пірімбетов, ҚР Суретшілер одағының Шымкент қаласы филиалының төрағасы Әбдімүтәліп Ахметов, Қазақстан көркем академиясы Түркістан ұйымының төрағасы Жақып Құттыбек, Танымал суретші, кескіндемеші, ҚР Суретшілер одағының мүшесі Шахарбану Әлімқұлова, Б.Өтеп атындағы өнер мектебінің мұғалімі Ербол Сейітқұлов Н.Шилібаевтың ерен еңбегі мен шығармашылығы жайлы ойларын ортаға салды.
Сондай-ақ, Ә.Қастеев атындағы өнер және дизайн колледж, №3 колледж, Б.Өтеп атындағы өнер мектеп пен қалалық көркемсөз мектебінің студентері мен оқушылары қатысты.
Кеш кейіпкеріне Б.Өтеп атындағы өнер мектебінің оқушылары Тастан Гүлзана жүрекжарды арнау өлеңін айтса, Жайсанбай Байбатыр «Сүгір» термесін орындап берді. Е.Темірбаева, А.Исаева, Ұ.Жорабекова, Г.Дүйсенбай сынды студенттер әсем әндерін шырқады.
Кітапханаға «Халықаралық суретшілер симпозиумы» атты үш тілде жарық көрген кітаппен қоса «Қазақстан» телеарнасының өңіріміздің суретшілірін түсірген «Бір туынды» атты түсірілімінің электронды нұсқасын, авторлық Әл-Фараби триптихы бойынша ортаңғы буынындағы Әл-Фарабидің фотосын сыйға тарту етті.
Кітапхананың директор орынбасары Гүлмира Алпысбаева шығармашылық кешті қорытындылап, Нұрлан Шилібаевқа естелікке кітап сыйлап, кітапхана қызметкері Динара Тұрмаханова «Алғыс айту» әнін салып берді.
