ӘДЕБИЕТТІҢ БАСТАУЫ – БАЛАЛАР ӘДЕБИЕТІ

2021 жылғы 2 сәуір күні «Халықаралық балалар кітабы күніне» орай Әл-Фараби атындағы қалалық ғылыми-әмбебап кітапханасында «Бір қала – бір кітап» акциясы аясында ақын Дәркен Өміртайұлы Танабаевпен шығармашылық кездесу кеші өтті. Қазақ балалар әдебиеті, оның ішінде балалар поэзиясында автордың «Мәуелі бақ» өлеңдер жинағының алар орны биік.

Кеште алғаш болып сөз алған кітапхана директоры Дүйсебаев Дәурен Әуелханұлы жас өрімдерді тәрбиелеудегі әдебиеттің бір арнасы – балалар әдебиетінің маңызына тоқтала келе, қаламгердің шығармашылығына табыс тіледі.

Әдеби кеште сөз алған фантаст-жазушы Сарманбай Исақ, қазіргі қазақ поэзиясын шығармашылықпен байытып жатқан жас ақындар Әлімжан Әлішер, Сүндет Сейітовтің ақынның балаларға арнап жазған өлеңдерінің ерекше табиғатына баға беріп, өзіндік жылы лебіз-тілектерін жаудырды.

«Шам» жас ақындар орталығының төрағасы С.Сейітовтың орындауындағы домбырашы Секен Тұрысбектің «Жазғы қар» күйі кештің ажарын аша түсті.

Белгілі сюжетке тартымды ойға, терең пікірге құрылған ақын Дәркен Өміртайұлының шығармашылығынан шырайлы қаламыздағы мектептердің білім алушы бүлдіршіндері «Анашыма мың алғыс», «Шымкент», «Ана тілі», «Ару көктем» сынды өлеңдерінен үзінділерді тым ыстық, ерекше ықыласпен оқыды.