Әл-Фараби мұрасы – өркениет қазынасы
Әл-Фараби атындағы қалалық ғылыми-әмбебап кітапханасында «Әл-Фараби мұрасы – өркениет қазынасы» тақырыбында республикалық конференция өтті. Ғұлама ойшылдың ұлы мұрасын талдап, насихаттауға арналған жиынға Шымкент қаласы әкімінің орынбасары Ш.Мұқан, фарабитанушы ғалым Ә.Дербісәлі, философ ғалым Ғ.Есім, тарихшы ғалым С.Мажитов, ҚР ҰАК директоры Ү.Мұңалбаева, «Руханият – Әбу Насыр әл-Фараби музейінің» негізін қалаушы А.Жұмашев, ОҚМПУ бірінші проректоры Б.Исабек, М.Әуезов атындағы ОҚУ проректоры С.Мәжінбеков сынды зиялы қауым өкілдері қатысты. Қазақ ғылымының өркендеуіне үлес қосып жүрген ғалымдар Әбу Насыр әл-Фарабидің өмір жолы мен ғылым салалары туралы баяндамалар жасап, өзара пікір алмасты. Сонымен қатар, Францияның еңбек сіңірген професссоры Альберт Фишлер мен АҚШ-тың Огайо университетінің професссоры Джеймс Патрик онлайн қосылып, ағартушы ғалымды ұмытпай, еңбектерін өскелең ұрпаққа танытып жатқандары үшін Қазақ еліне алғысын айтты. Әлемдік тұлғаның еңбектері жайлы талқылау конференциясы қаламыздағы іргелі оқу орындары ғалымдарының баяндамасымен жалғасты. Фарабитанушы Ә.Дербісәлі, тарихшы ғалым С.Мажитов кітапханамызға әл-Фараби жайлы құнды кітаптарды сыйға тартты. Конференция модераторы С.Мажитов іс-шараны ұйымдастырушылар мен келген қатысушыларға өз алғысын білдіріп, кешті қорытындылады.
Конференция аяқталған соң қатысушылар мен қадірлі қонақтарымыз Ж.Шанин атындағы академиялық драма театрында сахналанған «Әбу Насыр Әл-Фараби» тарихи драмасының қойылымын тамашалады.
